KEIMAH CU SIANGPAHRANG BAWIPA IH SABITTI PETU KA SI (Neh. 1:11)
Pastor Rev. Nehemiah Sui Nei Piang
Hakaliah fapa Nehemiah cu Artakzaksis in siangpahrang a tuan hnu kumkulnak, Kisleu thla ah Susan ih siangpahrang hna lungawi takih a tuan saklai ahcun a unau pa Hanani le midang pawl cu Jerusalem ihsin Nehemiah hnatuannak ah an va tlawng ih saltang suak zalen pawlih thuhla cu dinhmun setak ah mi relsiat an tong rero thu le Jerusalem kulh cu a se reirei thluh ih a sangka khal a kangse theh ti thu an sim. Cui thu pawl Nehemiah in a hon theih cun a to sutsi ih a tap ciamco. Cuihnuah Pathian hnenah thla a cam ih ninghang riahsia lungngai rawlhngei in ni ziangmaw tizat caan a hmang.Nehemiah hi hi tikcu ahhin siangpahrang sabitti petu a si. Amah hi mino cakvakzet, biaknak lamih mi hmangawzet, mitmen mawi, mi virvat tha le Pathian pawl ringring milaw, mi rinum, mi neelumtak a si. Hi san ih siangpahrang ih mi rintlak tlangval note pakhat a si. Nehemiah cu Judah pawl Babilon sal ih an tan san ih sualnak ah a tel lo nan a tongkam le a thlacamnak zoh rero ahhin a pupa, a hnam le a cipi sualnak ih tel ve rori vekin a rel aw. Na parih thalo takin kan um ih, na siahhlawh Moses hnenih na pekmi na daan pawl cu kan thlun lo ruangah na parah kan sual ti’n Pathian a bia. An ram tlusia remtha saltu ding khalah amai mawhphurh tumbik siin a thei aw ih hruaitu le a khawkhang tubik khalah a tang vivo.
Nehemiah cu tangdor takin Pathian hmai ah a phahniam aw ih an hnam remtha sal dingin a tuah aw. Zan ah a thilti dingmi hnatuan pawl cu zohman ih theih loin Jerusalem ah a feh ih, mi ihthah lai zandai ah a zohfel thluh hnuah a miphun pawl a kokhawm ih, “Fehthlang uhlaw, tuanthlang uhsi, relsiat ih kan umlonak dingin Jerusalem kulh cu kan dinsal thlang pei,” a ti a si. Nanmah ten kulh din uh a ti loih ti-awter takin keimah in ka dinmai ding a ti fawn lo. A ci le kuang pawl thawn lungrual takin relsiat ih kan um nawn lonak dingah a siatmi kulh cu kan dintha sal pei a ti a si. A tongkam cu a va mawi lawmmam ve ti uhlaw! A la hranpa aw duh loih a miphun pawl si vekvek kha si a tum vivo ngam a si. A selam mawhthluk men loin a mi pawl lakih tel duh vivotu a si. Thu a rot vek le a sawmnak vekin Israel mi pawl cun hna an tuan thok vivo. Pathian a tih ruangah loram khal amai, hlawknak dingin pakhat hman leimi a nei lo. Amai hrang bul ih sumkhawlmi khal a nei lo.
Mipi pawlin a zar an to durdo vivo mai a si. Curuangah ralthatak le huaisen takin hna cu an tuan vivo ih tibahlah tumtu pawl zohman hlawhtling an um lo. Bum le thah an tum theu nan Pathian in a hum ringring. Rinumtak le thahnem ngai takin hna cu an tuankhawm vualvo ih hna harsatak cu an theh tariai. Sangka kiltu le hlasaktu pawl a ruatfel thluh ih sangka on tikcu le khar tikcu khal a tikcu caan te-ih tha takih kilhim dingah ziangkim a ruatfel thluh. A ral pawl relsiatnak vekin siangpahrang tuan a tum maw? A tum lo. A unaupa Hanani le a dang Hananiah, Pathian a tihzahtu, cu Jerusalem ih hotu dingah a ruat.
Nehemiah in Pathian a zoh ih amah le mah a hmu aw. “Bawipa Pathian, kei cu na hrangih pe aw sianglotu siangpahrang Artekzaksis ih duhzawng ih um theutu mi santlailotak ka si. Ka sual tukih na duhzawng in ka nung lo. Tuisun ah ka thei aw suak a si. Na hmai ah zianghman ka si lo. Nang aiin Artakzaksis hril sawntu ka rak si. Sihmansehla ka sirawknak mitthli hi i cohlang sak dingih, na hnenih sualsir ih kirsal pawl ngaidam theutu Pathian na si kha, thu na tiam theu vekin ka sualnak ngaidam dingin le in umpi vivo dingin ka lo dil a si,” tiah a ti.
Zokhal hmuhsuam dah lo, dodaltu khal si tum dah lo, mai hrang hlawknak lawng hawlmai lo, hnam le miphun remtha dingih a nun a pe ngamtu Nehemiah vek ram hruaitu kan ram le miphun in kan tul a si.
A siartu zate Pathian in thluasuah malza sawm hram seh. Amen.///
No comments:
Post a Comment