DBCF Meifar, August, 2013. Nunnuam Timi Hi Ziang A Si Pei?

NUNNUAM TIMI HI ZIANGVEK A SI PEI?

By Salai Mapek

           Dinhmun le sinak bang-aw lo, thil dangdang ruangah refugee in Delhi kan ra thleng cio cu a si ko nan, bangawknak zawnte cu kan nei. Cucu ziangasitile  kan nundan kel hnakih dinhmun thasawn, nunnuam sawn ih um thei kan duh cionak hi a si. Nunnomnak famkim hi leitlun ahhin a um taktak pei maw? Leitlun ah umnak ram le acozah ih zirin ei le in cawmawk olsamnak, fimthiam zir olsamnak le hnatuan ding tamnak cu a um ko nan khuitawk ram khalah len theinak lamzin cu a um theh. Pathian in minung parih thlawsuah a pekdan ih zirin a si sawn.
          Delhi ah ziangtluk rei kan um ding, ramthumnak ah kan feh ding maw kan ram ah kan kirsal ding ti hi minung ih rel dik theh theih a si lo. Kan thu le kan duh dandan in kan beiseimi resettlement kan ngah thei lo ruangah zianghman tuah lo ih beidong in kan um cuahco men ding maw? Si hlah ee! Kan caantha hi a lak ih cemter men loin harsatnak lak khalah kan ti thei umsun kan tuah a tul a si. Fimthiam zirnak a phunphun, computer, puanthit, kutthiam pakhat khat tal cu Delhi kan um sungah hin zirsuak ding kan si. Cathiamnak le hnatuan thiam hleicemi pakhat khat Delhi ah na sarsuak a si ahcun ramthumnak ah na thlen tikah na hmakhua a ongzet ding. Na feh ngah lo a si hmanah khuitawk hmun khalah na pumcawmnak hrangah donhar tuk loin na um thei ding.
          Leitlun ah kumkhua ih nunnomnak le lungawinak famkim cu hawl hman sehla kan hmu dah lo ding. Ziangahtile leitlun ramnuam ti ih hminthang Australia, Canada, USA tvp. khalah harsaknak le beidonnak a tuartu mi tampi an um thotho. Cuiruangah leitlun ahhin lungawinak famkim le nunnomnak famkim cu a um lo ti a fiang.
          Bible ih in sim vekin colhhahdamnak le nunnomnak famkim cu vanram lawngih  ummi a rak si. Ramthumnak ih ceng pawl hi mi vanthabik an si cuang lo. Mi vanthabik le nunnomnak famkim cotu ding cu leitlun khuitawk ih um khalah Jesuh thawn tonawk a man ringring nun neih hi a si. ///