TIRHTHLAH (ACTS) CABU HLIAKHLAINAK (1)
Salai Ngun Sin Mang
Hi cabu in fiang le fumfe takih in simmi cu, Jesuh a thawhsal veten Jerusalem-Rome Thuthang Tha a karhzainak le kawhhran a suahkehdan, le a thanglendan pawl a si. Cun Jesuh Khrih ih nunnak le Pathian hna a tuannak cu kawhhran le zumtu hmaisa pawlih nunnak thawn a pehtlaihdan khal a langter. Cun tirhthlah pawlih Pathian hna an tuannak ah Peter le Paul ih thupibiknak a tarlang.
Kuatmi (Cakuat Dongtu):
Luke in a cabu hi Theophilus timi pa hnenah a kuat. A hmin sullam cu “Pathian duhdawttu” tinak a si. Thuanthu thiam pawlin Luk. 1:3 le Tir. 1:1 ih Theophilus hi zo ciah ti an theifiang lo. Asinan Rome mi a sizia, khristian zumnak ah thinlung lut zettu le ngainatu ti cu fiang zetin kan thei thei. Cucu Dr. Luke ih cabu a kuatnak in a fiang. Luke in amah hnen lawngah ca a kuat loih; Gentile mi, leitlun mi hmuahhmuah hnenah a kuatmi a si.
Cangantu Le Ngan Kum:
Hi cabu ngantu hi Luke a siih, Greek mi a si. Cun Thukam Thar cabu ngantu pawl lakih Gentile mi umsun a si. Cathiam zirsang a si fawn. Kol. 4:14 ah “Ka duhdawtmi sibawi” ti’n kan hmu thei. Luke hi tirhthlah 12 lakah a tel lo nan Paul ih rualpi tha, a khualtlawnnak kip ih thlun vivotu a si. Cun Luke hi santhuanthu thiam, Roman nunphung, daan le thu, cun Palestine, Asia Minor le Italy ram umdan theitu a si. Hi cabu hi AD 62 le 70 karlak asilole Jerusalem siatbal a si hnu AD 70 hnuih nganmi ti’n an zum. A poimawhmi cu a ngan kum cekci siloin Luke in ziang tumtahbik in a ngan ih kan khristian nun ah ziangmi a thahnem thei ding ti sawn hi a si.
Thusirhsanmi:
Hi cabu hi Jesui’ thukam, Pentecost ni ah Thiang Thlarau a thleng ihsin a thok. Cuih ni ihsin zumtu pawlin Thuthang Tha phuan le theihpitu ding kawhhran thar cu Rome uknak sungah an din ih a karhzai vivo. Zumtu pawl cu Thiang Thlarau ih huham cahnak a pek vekin Jesui’ rundamnak Thuthang Tha cu sim in tetti an khan vivo. Cuticun kawhhran cu local zawngin siseh, leitlun pumpi huap in siseh, a thanglian vivo.
Kan theih a poimawh zetmi cu ka huham cahnak le kaihhruainak thawngin a si sawn. Kawhhran le leitlun ih Khrih hnatuan hi mangbangzazet a si. Kannih cu a hmanrua kan siih, khristian ram a karhzainak cu Pathian ih hnatuannak ruangah a si sawn. Thiang Thlarau in a hnatuan duhnak, hmuhnak, thinthar thawhnak, ralthatnak le thiltitheinak pawl cu zumtu pawl hnenah a pek.
A dang thil harsa a phunphun; thawngthlaknak, vuak hrem thah thawi, lungto den tuarnak le thah tumnak pawl khal kan hmu thei. Thuthang Tha cu hnong in zumtu pawl cu hrem hmansehla, kawhhran thanglian dingin zumtu pawl cun pumpe aw in hna an tuantlang. Pathian hna kan tuannak ah beidonnak, hnonnak le harsatnak a phunphun kan tong nan kan rianmi Pathian in kan harsatnak sung ihsin mangbangza a tuah thei ti thei in kan thinlung sangka ong ih dinghngettu kan si a tul. Culawngah Pathian in amai’ hna kan tuannak ah thlawsuah malza in pe ding a si.
No comments:
Post a Comment