DBCF Meifar, November, 2013. TIRHTHLAH (ACTS) CABU HLIAKHLAINAK (2)

TIRHTHLAH (ACTS) CABU HLIAKHLAINAK (2)

Salai Ngun Sin Mang

Tirhthlah Cabu Sungih Theih Cakum Zetmi Thilcang Pawl: Zumtu hmaisa pawlih thil harsa (problem thubuai) an tonmi pakhat cu mihrek in Paul cu tirhthlah hleihnih pawl thawn an bang aw lo an ti. Asinan mi thenkhat cun tirhthlah hleihnih pawl thawn an sinak a bangrep an ti. Ziangahtile can tampi cu amah rori khalin tirhthlah diktak a sizia a sim ih a tang hnget. A hleice in Korin le Kalati cakuat ah kan hmu thei. Tahthimnak ih kan hmu theimi Bible bungcang pawl cu, I Kor. 9:1-2, II Kor. 11:15, II Kor. 12:11-12, Kal. 1:1-2 le Kal. 1:11-12 an si.

Kan Zir Dingmi Pawl: Kan nunnak ah teh ziangti zawngin hi cabu in in kaihruai? Tirhthlah cabu in a ropi zetmi ro in tantami cu ziang a si tilen kan zate rundammi kan si thei timi theihfiangnak neih hi a si. Jews pawlin a thokpek ahcun rundamnak hi anmai hrang lawngah an ruat. A taktak ahcun rundamnak hi leitlun mi hmuahhmuah hrangah a siih, hrilcemi zohman an um lo, kan zate hrangah a si.
Hi cabu in in theihtermi cu tirhthlah pawl lawngin Thuthang Tha cu Gentile mi pawl hnenah an sim lo. Zumtu pawl hremnak an tuarnak ihsin an tlan ruangah Gentile  pawl hnenah rundamnak ThuthangTha a thleng sawn a si. Hi Tirhthlah (Acts) cabu in thlacamnak ih a thupitzia vei 31 a langter.

Mangbangza thil cangmi le thu an thencatnak pawl khal thlacamnak thawn lawngin a si. Cun ziangtin kawhhran a thangso theidan ding? tvp. khal a simfiang. Himi pawlin Khrihtian ram karhzai tertu cu Pathian a sizia le a thu, Pathian tongkam, in thil ziangkim hi a cangsuak ti a phuanglang. Tuni zumtu le kawhhran tin in hi Tirhthlah cabu sungih zir dingmi pawl zir in thlacamnak le Pathian rinsannak thawn hmailam ah kekar vivo thiamtu kan si cio theinak dingah Pathian in thlawsuah lo pe hram seh.
(Acts hliakhlainak a theh.)