MOTHER’S DAY
By: Antony
Mother’s Day hi hlanlai ahcun Greek pawl in an pathian NU sunlawihmak ah an rak hmang. Roman Catholic pawl in Jesuh nu Mary sumlawihnak ah an rak hmang. Kan dunglam kum 150 ihsin Mother’s Day hi Kawhhran ah hman a si.
Christian-nak ih Mother’s Day hramthoknak cu Anna Jarvis in society sungih mi dam lo le farah harsa pawl ih dinhmun theihthiam a `ulzia le Society in an tuarnak a theihthiampi ding hi NU pawl ih mawhphurh a si tiih a au Ni cu Mother’s Work Day tiin a rak ko. Anna Jarvis a thih hnu ah, a fanu Young Anna in a NU damlai ih thil`ha a tuahmipawl sunlawih upatnak le hngilhlonak pangpar cu West Virginia Biakinn ah hlannak a nei. Hi ni hi leitlun in sunlawih upattlak NU pawl ih NI (Mother’s Day) ah pom a siih tusan zumtupawl in May thla a zarhhnihnak Nipi Ni cu Leitlun huap in Nupi ah hman a si. Mi hmaisapawl cun hi ni ah an NU le sunlawih upatnak ah Biakinn ah an feh, an nu le cakaut, card, present le pangpar an pe theu.
Kannih zumtu pawl in Nu Ni kan run hmeltheihnak khal a reihrih lo ih, a hman daan khal kan theithiam tawk hrih lo a bang. Mother’s day hi Nu pawl sunlawih upat peknak lawng ih hman ding a si lo ih, NU pawl in an dinhmun le sinak tawkte ih Innsang, Kawhhran le Society ih an pekawknak theihpi le pompinak thawn hman ding a si. Mother’s day hin leitlun hrang ah thu (message) runken telmi a nei ih, “Nauhak pawl hnenah NU an thupit zia le `ihzah ih sunlawih upat tlak an sinak le Pa pawl hnenah Nu ih dinhmun le sinak leitlun in a `ul zia in theihter a si. Nu ih dimhmun le sinak leitlun in a `ul zia theithiam hrih lo NU pawl hnenah an mawhphurhnak a theihter. Cuihlei ah kan society ih Nunau palbetnak ruangih kan society hma a sawn thei lo-nak in zirhter. Rel duhmi cu Nu fim le thiam (fit) taktak kan nei nan pasal an neih vete’n Kawhhran le society ah hman theih lo in an hloral. Ziangahtile retheihnak ruangah a si thei, a taktak cu NU a si-nak society in `ul lo vekih a retawk ruangah a si. Nauhakpawl in NU le sunlawih upatnak ah pangpar pek ih, sunlawih tlak NU an sinak theih thiampi le sunlawih upatnak cakuat, card, present le pangpar pek cu Mother’s Day ih hram thawknak (historical background) a siih, Christian nun mawi khal a si.
Nu ih mawhphurhnak le sinak hi Innsang lawng si lo in, Kawhhran le society khalin a tul ih leitlun ah Nu a tel lo cun a famkim thei lo. Nu hi leitlun ih mawinak, nomnak, daihnak le hnangamnak nan si. Curuangah zokhal thleidannak nei loin Pathian in NU vekih in duhdawtnak le in lainatnak hi NU pawl ih nun ah um ding le langsuak ding a si. Nu nan si-nak ih par le rah cu mi zokhal thleidannak um lo in tlaan theih ding a si. Mi hmuahhmuah ih nu nan siih, cuih nan sinak ih a irhsuak mi duhdawtnak le lainatnak cu Innsang tin, Kawhhran tin le Society tin in an `ul. NU pawl ih nan zirternak cu a kangral thei lo mi RO sunglawi a si. NU `ha na sinak le Nu poimawh na sinak Mother’s Day in a lo nemnghet zo. Nunau nan si ruangah thinnau lo in, nunau nan sinak ruangih leitlun in sunlawihnak a lo pek ruangah lungawi uh. Daihnak le Remnak leitlun ih hring suaktu NU si hram aw....
No comments:
Post a Comment