By- Rev. Mike Zung Ceu
April 6, 2012 Good Friday Ni ih siar dingah Nitin Thlarau Rawl cabu sungah thuanthu tawite an ngan. Nupa te pahnih cu Rocky Mountain lam pan in motor thawn an feh. Rin lo pi’n motor tumpi in a pah hai ih Colorado tiva pi sungah an motor thawn an tlak.
Tiva sungah cun an nupa in an talbuai. Culai ah motor tumpi mawngtu in hridai saupi pakhat tiva sungah a run sep. An pa in zamrang te’n an nu umnak lam ah cuih hridai cu a hei sep bet. Cuticun an nu cu tikap ah an dirsuak. Asinan an pa cu tidai in a fen hlo ih a nunnak a cemta. Amai’ nunnak cu cem hman sehla a duhdawtmi a nupi ih nunnak cu a runsuak ta a si. Johan 15:13 sungah, “Mi pakhat in a rualpi pawl hrangah duhdawtnak tumbik a neihmi cu an hrangah a nunnak pek hi a si” ti’n a um. Si, Jesuh Khrih thinglamtah parih a nunnak a pek mi hi “Kan hrangah rundamnak” a si ih “Duhdawtnak tumbik” a si.
Rundam kan tul maw? Kan tul. Ziangah kan tul? Kan zate misual kan si.1John.1:8-9 ah hitin kan hmu: “Sualnak ka nei lo a titu cu mah le mah bum awtu an si. An sungah thutak a um lo.” Rom 3:23 sung khalah, “Mi hmuahhmuah misual kan si” tiah a um. Cun, “Sualnak man cu thihnak a si” tiah Rom 6:23 ah in sim. Asile kanmah te kan rundam aw thei maw? Run aw thei lamlam hlah. Rundamtu kan `ul a si. Curuangah Peter cun hitin Jesuh ih rundam kan `ul zia in sim: “A lo luattertu cu a siat theimi sui le ngun vek a si lo. Soiselnak a um lo mi Raitluan Tufa bangtuk a simi Khrih Jesuh ih Thisen, a si.”
Thukham hlun kan zoh tikah Temple sungih sungtabik (Hmunthianghlim- Thukham kuang retnak zaangfahnak tokham) ah Puithiam pawl in sualthlahnak ni (Day of atonement) ah rannung thisen thawn sualthlahnak an tuah `heu. Cumi cu Pathian thindaihnak hrangah an tuahmi a si. Kan Lai daan ah kan pupa pawl in thisen ih ngaidam awknak an rak nei ve. Mi pakhat in a thil tisual mi parah ngaidam si a duh tikah rannung pakhat khat kengta in thisen luannak thawn ngaidam a va dil ahcun a sualnak ngaidam sak a si. Thisen lon hnu ih a ngaidam lo a si ahcun “A ngaidam lotu parah mawhphurhnak a suak” ti a si. Curuangah thisen luanawk hnu cun an ngaidam aw ringring. Bawi Jesuh cu thinglamtah parih a kai ding hi a cangthei ahcun hrial a duh ko (Lk.22:41-44), lung retheizet in thla a cam. Asinan, “Ka thu si hlah seh, Nangmai’ thu si ko seh” tiah a ti. Calvary ziintluan ah zomtaihnak le hremnak tampi a tuar hnu ah Thinglamtah parah a thisen tampi luang in a thi. Curuangah Paul in Rom 5:8 sungah, “Pathian in ziangtluk in so in duhdawt ti a lang: Misual kan si hrih cingin kan hrangah Khrih cu a thi “tiah a ti. Rom 8:32 khalah hitin a simbet: “A fapa neihsun hman zuah loin kan hrangah in pek zo.” A si, Jesuh cu kan hrangah, kan ai-awh ah kan tuar dingmi hmuahhmuah in tuarsak a si. Thinglamtah parah Bawi Jesuh in tongkam 7 a `ongih cumi sungah, “Ka Pa ziang an tuah ti an thei lo, an sual ngaithiam hai aw” (Lk.23:34) a timi hi Jesuh ih a hnatuan thupibik pakhat a siih a Pa, Pathian in leitlun ah a Fapa, Jesuh a runthlahsannak thupibik a famkimnak khal a si. “Ka pa,… tih le khur cingin… nangmai’ duhnak vek si koseh…na tumtah vekin thinglamtah parah… leitlun mi hmuahhmuah ih ai-ah ka tuar zo… Rundamnak hrangah ka hnatuan ka theh thluh zo (Jn. 19:30)… an sual ngaidam thlang ko aw” tiah thinglamtah parin a Pa hnenah zaangfah a dil hnu ah,… “Ka Pa, ka thlarau na hnenah ka ap” (Lk.23:46) a tiih a nunnak a cem ta. Asinan… Jesuh Khrih cu a thilanta lo… an phum hnu nithumnak ah thihnak neh in a tho saal… Jesuh Khrih cu… keimai’ ai-ah thihnak a tuar, A thisen thletmi ruangah Pathian ih ngaidam mi ka si zo… keimai’ tuar digmi sualnak man hmuahhmuah in tuarsak thluh zo ti na zum ahcun rundamnak cu “Tui ni” na ta a si ding (Efe. 2:8-10; Jn. 3:16).
No comments:
Post a Comment