DBCF Meifar, October, 2013. US GOVT SHUTDOWN THLIRNAK POINT (4)

US GOVT SHUTDOWN  THLIRNAK

POINT (4)

By: Chief Editor Salai Thang Lian Mung

US acozah shutdown Oct 1-16 a rei. Shutdown sungah acozah hnatuan 3.3 million ih ting 8 cun an hna an cawl. Shutdown ruangah $24 billion, nikhat ah  $78 million, cu an sung.

Point-1: US Federal Govt hi vei 18 rori khar a si zo. Cu pawl cu: 1976 (ni 10, tum 1), 1977 (ni 28, tum 3), 1978 (ni 18, tum 1), 1979 (ni 11, tum 1), 1981 (ni 2, tum 1), 1982 (ni 4, tum 2), 1983 (ni 3, tum 1), 1984 (ni 3, tum 2), 1986 (ni 1, tum 1), 1987 (ni 1, tum 1), 1990 (ni 4, tum 1), 1995-96 (ni 26, tum 2), 2013 (ni 16, tum 1), pawl tla an si.

Point-2: Shutdown sungah acozah hnatuantu pawl cu lotheih le lotheihlo tiin an then ih, lotheihlo pawl cu: Security agencies, mail dilivery, air traffic, police, nurse, mei ralkap, tvp. hi an si. Culo hmuahhmuah cu lotheih a siih an khar. Lotheihlo lakah President khal cu a tel ih, shutdown sungah a thlahlawh $ 400,000 cu a ngah ding. Cun House le Senate, White House hnatuantu 1,265 ih 436 lawng hi lotheihlo an si.

Point-3: Shutdown hi Republicans le Democrats, Obama le Ted Cruz,  pahnih ih doawknak a si. House Rep. pawlih Tea Party cun 2013-14 Fiscal Year ih Spending Bill (SB) thu ah, Obamacare hi thlak an duh ih, cucu Obama ih party Democrats ih khuhnehmi Senate in an lungkim lo. Cun Obama in SB cu a sign duh lo. Obamacare thuhla ah Obama in president ka tuansung cu zohman in an kham thei lo ding a ti ve. Culai ah Oct 17 ah Govt ih sumcawi theinak cu 16.7 trillion hnakih tam hrimhrim a ngah lo ruangah shutdown cu on tengteng a tul. Cunah House Rep. pawlin sumcawi theinak cu rei le tam deuhin than sehla ti’n Oct 12 ah an thehlutsal nan, White House cun a el. Cucu House Rep. John Carter in, “Obama cu ‘siangpahrang president’ bangin a um. Atu tiangin ‘my way or the highway’ in a um hrih ko hih!” ti’n a ti. Obama cun House Rep. le Senate Rep. cu a hranten veve in a tong ih, Oct 16 ah SB cu Obama duhzawng in an tuahfel thei ih, Obama khalin a sign ve. Cucun Obama in nehnak a co.

Point-4: Acozah khar dingin House Rep. pawl a control theitubik cu Ted Cruz, kum 42, Texas Senator, Rep. pa hi a si. Ultra-Conservatives pawlih Tea Party sungtel a si. Tea Party cun tax tampi lak hi an duh lo. Cruz hi Obamacare dokalhnak ah Tea Party le Texas ah a lar ciamco. Texas hmun hrekkhat ah “Ted Cruz vekih raltha Republicans tampi kan tul hrih” ti’n ca an tar. Asinan Rep. pawl ruahnak pek theutu Matt Mackowiak in, “Texas hi America a si lo,” ti’n le, Kay Bailey, Rep., khalin, “Texas hi America sung cu asinan, America pum a huap lo. Ram pumpi ih ruahdan a si ve lo. 1994 ihsin Texas ah Democrats in hmun a co nawn lo. Peter Kings vek Texas ah a um ve si lo,” ti’n a ti.

Peter Kings hi House Rep. asinan, Obama lamtang a si. King in Cruz thawn pehpar in, “Ted Cruz hi acozah khartertu a si. Anih in mi siatsuah ding lawng a ruat. Ziangahtile amah in thil tuahthokdan pakhat hman a thei lo. Tuihnu ah hivek thil tuahsal dingih can kan peksal pang ahcun, kan palhnak a si ding,” a ti.

Ted Cruz cun, “House of Representatives pawlin tuanvo thei zetin, America mipi dinhmun zoh in, raltha zetih an umlai ah Senator pawl cun upa umdan vekten dai ziarziten an um men,” ti’n a ti.

(Hram: Thuthang Ca & Internet Cahmai tampi zohthimmi a si. Rep. = Republicans)