DBCF Meifar, August, 2013. DBCF Tlawng (2011-2013)

DBCF TLAWNG (2011-2013)

Sayama Sui Hoi

DBCF Tlawng kumthumnak tiang lam in hruaitu kan Pathian a hming thangthat in um sin ko seh. “Tlawng a neitu DBCF sungtel zate siseh, hruaitu upa zate siseh, duhsak zetih tuanvo a lazotu pawl le tuanvo a lak rero laitu bulpak nan zate siseh, sumpai in in bawmtu zate tlunah siseh, nan zate parah Pathian ih thluasuah malsawmnak thleng hram seh,” ti’n thlaza ka cam.
Tuikum (2013-14  Fimzir Kum) khalah Pathian lamhruainak in April thla ihsin tlawng kan phuan thok. Kan fale tlawngta nauhak 40 lai an kim. A kaitu nauhak pawl cu kawhhran zawngin DBCF, LFBC, GBC, ZCF, BMCF le CCF pawl ihsin an si. Community zawngin Falam, Hakha, Mizo, Zomi ihsin an si. Budella le a dang hla deuh ihsin kai pawl hi rickshaw man tumsak an si. Zirhtu saya/ma 4 kan nei ih taimak zetin in zirh sak. Zohman thleidannak um loin kan DBCF Tlawng ah zovek nauhak khalin tlawngkai a theih ringring.

Kan thutlang tar cu Thufim 1:7, “Pathian tihzah cu fimnak ih hramthoknak a si,” timi a si. Hi thutlang hmangin kan fate pawl Pathian tihzahtu an si theinak dingah nasa takin tanlak rero a si. Kan zirhmi Subject pawl cu, English, Maths, Science, Social Studies (SST), General Knowledge (GK), Environmental Studies (EVS), Moral Science (Pathian Thu), Chin (Laica), Burmese (Kawlca), Hindi (Vaica), le kutngan mawi (cursive), zuksuai (Drawing), English Conversation, Rhymes le Hla pawl an si.
DBCF Tlawng ih tumtah bikmi cu, kan fale nauhak tete pawl hi:
1) Pathian tihzah, duhdawt thiamtu nauhak piangthar le cathiam si dingah.
2) Nu le pa, saya upa tihzahtu le nunziamawi neitu si dingah.
3) English siarthiam le tongthiam si dingah.
4) Mathematics fiang zetih thiam le zirpeh vivo theitu si dingah.
5) Chin ca le Burmese khal siarthiam le nganthiamtu si dingah.
6) Hindi siarthiam le nganthiamtu si dingah.
7) Tlawng dangdang ih an kaipeh tikah kaipeh vivo theinak thiamnak neitu si dingah.
A tlunih tumtahnak pawl thawn theitawp in, Phunhrek (KG) ihsin Phun-4 tiang class 6 then in zirh rero a si.
 DBCF Tlawng in mipi nan zate ih thlacamsaknak le tanpitnak kan tulzet a si. Hmundang ramdang, lamhlapi, ih theih dahlomi thlarau hlo kan ngainat duahdo vekin, kan kiang le kan tang sungih a ummi kan fanau tete pawlih thlarau, thinlung taksa khal runsuah le ngainat hi a tul vezet a si ti’n kei cun ka ruat. Pathian in kan kut sungih tuanvo in pekmi hna, kan fale tete pawl kan kilkhawidan thu hi a hnen kan thlen tikah in sut leh ko ding. Ziangtin so kan let ding? Kan tuanvo thupibik pawl lakih pakhat a si vemi kan fale nauhak pawlih thlarau runsuak ding hi hngilh hram hlah uhsi.
 “Pangpar phunkim mawi zetih an parnak kan pangpar hmuan mawite hi ti toih in tuamhlawm cio ve uhsi.” ‘Pangpar mawite parnak DBCF Tlawng’ ee sinsin in na rimhmuinak Pa Pathian hnen tiang thleng hram seh law.