DBCF Meifar, August, 2014. Pastor Sermon

BIBLE IN THLARAU THIANGHLIM A PHUANSUAHNAK PHUN (4)

Pastor Rev. Nehemiah Sui Nei Piang

1. Ca Thianghlim A Thawkkhum (Tir. 1:16, 28; 25, II Tim. 3:16, 2 Pit. 1:20-1).

Pathian Thutak kan theih theinak lamzin umsun cu ca thinghlim Bible hi a si. Pathian phuansuah awknak le thumawknak tlakbik a si. Bible ngantu kamsang pawl khal kha Thlarau Thianghlim ih thawkkhummi an si. Hmailam kan fehnak ding le nunnak lamzin in khihhmuhtu thabik khal a si.

2. Thiang Thlarau Cun Jesuh Khrih Ih Sinak A Phuanglang (Joh. 15:26; 16:13-4, Tir. 5:32).

Thutak a phuanglang lawng siloin keimah hi Thutak ka si a ti (Joh. 14:6). Thutak ka si titu Jesuh kha taksa nei in leitlun ah a ra a si. Catuan Thutak thei ding cun Khrih kan theihfiang a tul. Thiang Thlarau cun kan hnenah Khrih thu in sim ih mihlo pawl hnenah Khrih cu Pathian fapa a si ti thu a fiangter. Zumtu mi piangthar hnenah  Jesu’ thuhla le a zirhmi pawl theifiang deuhdeuh dingin, Ca Thianghlim hmang in, in bawmtu khal a si.

3. Thutak In Zirh Ih Thutak Sungah In Hruailut (Joh. 16:13).

Thutak sung hruailut ti cu Jesuh bangnak le a mizia ih thanlen vivonak a si. Pathian thutak kan theihmi thlun dingin kan thinlung ti khoh lo ding, a thu kan thlun theinak dingih in hruaitu a si (Heb. 3:7-8). Kawhhran upa hmaisabik pawl kha Thiang Thlarau in an khat ti kan hmu  (Tir. 6:3). Paul khalin Kolosa kawhhran pawl kha Thlarau Thianghlim ih pekmi fimnak an neih theinak dingah thla a cam sak (Kol. 1:9). Thutak in simtu in zirhtu kan neihsun saya a si (Joh. 16:13).

4. Zumtu Kanmah Hmangin Midang Hnenah Thu A Sim (Mar. 13:11, Luk. 12:12, 1 Kor. 2:4).

Kan umnak ruangih thuthentu pawl hnenih thuthennak kan ton tikah kan tong dingmi tiangin Thiang Thlarau in in sim a si. Thu tiamkam maksak kan nei. Paul in zumnak maksak a neih theinak cu a mai theinak le tongkam men siloin Thlarau Thianghlim huham ih a thuam ruangah ti a mang ringring (1 Kor. 2:4). Tui kanni’ san khalah zumtu mi piangthar pawl hnenah Jesuh Khrih ih Thuthang Tha

midang hnenih sim vivo dingin Thlarau Thianghlim cu kan sungah a tong ringring a si.

A siartu unau kan zate parah Pathian malsawm thleng hram seh. Amen.