NUNI BIAZAI MAWI ... DBCF NUNI SUNGLAWI

 SUNGHNO KA NU

Ngantu: Pi Hrang Tin Sung

Mother’s day a thleng leh saal ee...
Sunghno ka nu hnianghni  ka lo ngai ruahro,
Laicin seempi te leh hringtu nu le pa taan in;
Ka pa thlunin tluangdangah na rak lawi maw...
Na seemnak khua le ram silo hmanseh,
Pasal fanau tla na khawvel ah na hmang;
Rei a rial lo na nunsung kum sawmli le pathum vial,
Pumpi cancer natnak in famdairial a lo can ter.



Kapai’ tanghlum cu kanui’ awm hluan ih hngengin,
Caan ka hun hmang mual na liamhnu cun;
Hmanseh kan cung Mamgbawi in ka hrang rem a ruat.
Kum sawmli pathum a liam sal hnu ah,
Kan khua le ram hruaitu cozah in;
Na ruhro te phorhnak caantha in run pe.

Sungkhat laina rual le hawi tla in,
Vaivut lo dang hmuh ding um nawn vek hlah in ti;
Hmanseh fahniang hmuhlai duh in na ziamral siang lo.
Ka nu ka lungkuai aw khaw,
Ka umnak hmunkip ah rauthla in i rak zeel camcin maw;
Hngilhni um nawn vek hlah ee ka nun ni a liamhlan tiang

19th Febuary 1970 pialleidai ah zaalzo hmanla,
 19th Febuary 2013 Na hrinhniang tla in thlaza camnak thawn
Manglian kapa’i kiangah kan lo zalh saal ee...
Kan cung vanram suikhawnuam in,
Duhmi papa le  unau pawl thawn
Lungawi soparten in hmuak leh uh maw Nunu.



...........................................................................


NU HNGILHLONAK

Ngantu: Nu Ngaih Sang




Thlafong bang pai ih thisen thawn in hringtu ka nu,
Na aankaa mawi le thlum ceen ih kan leennak ka thlir;
Ngailungzur in biangah luaithli hnul phah in,
Nu hngilhlonak biazai hlan ning-naw.

Kan cung Mangbawi lairel khawpa khawnu si dingah,
Semnak lairam hrang le mipi hrang;
Vang-ar khuan hlan zantim lai ih tii-hnaa tin ah,
Ka pa thawn Pathian nan biaknak hmunte khi a hmun ee;
Hlanlai an cang zo maw fahniang lungthin dar bang kuaitertu.

Ka nu kan sumtualrawn le kan ruun-inn
Na duhdawtnak thlazar hnuai ih kan leennak
Na cawi hrinhniang te hrang mitthli thawn na thlacamnak au aw
Na fahniangte lungthin muril fan riangro ee.

Kanu ka lo duhdawt, Kanu ka lo ngai tuk,
Na thlacamnak zarah Pathian fahniang ti kawh kan si thluh;
Leitlun cu thenawknak hmun Pathian ruat cia a si,
Thenlonak van Jerusalem ah ton leh hngakhlap- ing ee.
........................................................................................



KA NU IH TANGHLUM




Ngantu: Lal Tan Ngai

Semmawng ka silai ah ka nu’n i cawi,
Kei ka hnangam ka nu’h tang hlum ah;
I pawm, i cawi, i hnam duhdawtnak in,
Duhlawng i nge kei duatmi fahniang.

Thianrual’n in tawh can ka tlung ka nui’ hnen,
Kei ka hnangam ka nu’h tang hlum ah;
Thimzing, muthla, kei zianghman ka `ih lo,
Duhlawng i nge kei duatmi fahniang.

Harsat mangbang can ah kei ka nu ka hlam,
A thlacamnak cunglai ninu bang rong thleng,
Sualnak, harnak, phannak ka tih nawn lo;
Mang Ngen sunghno ka nu’h zar ah.
.........................................................