MINO LE TAIMAKNAK
Salai Lal Tan Ngai
New York khawlipi ah mi pakhat in tlangval hmelthatak cu cibai phah in, “Nang cu kan ram hruaitu President hman na tuan thei ding,” a ti. Cupa cun cuvek si dingin a rak ruatawk dah lo. Asinan cui tongkam cu a thinlung sungah a nung ringring ih taimak suah in ziangtinkim a tinak ah tan a la ih USA President ah a rong cang taktak. Cupa cu khawvel mitheih larzetmi Bill Clinton hi a si.
“Tumtahnak a umlo cun taimak a theih loih, teimaknak loin hlawhtlin a theih lo, hlawhtlinnak tel loin milai sinak in umzia a nei lo.” Tulai kan mino tampi cu ziang ka tuah thei? Ziang dinhmun tiang ka thleng thei? ti theiawk cuca loin vanim cawngthai bang herkual vel maimai ih ni, thla le kumcang liamtir ih mi hlawhsam ih mahte tuah awtu tampi an um. “You can win” timi cangantu India cangan thiam hminthang Shiv Khera cun “Nehtu pawl thil danglam an tuahlo. Danglam takin thil an tuah sawn” a ti. A umzia cu tlawng hmunkhat ih kai, class khat ih to pawl hlawhtling le tlinglo an ummi hi a hlawhtling pawlin thil danglam an zir loih an zirmi parah danglam deuhih an zuamnak le teimaknak parah an hlawhtling sawn a si. Mino le taimaknak thu thawn hlawhtlinnak lamzin ih a tulmi le minung ih kan nunsanbik pa 2 ka tarlang duak duh:
Mino le Zirnak: Delhi kan mino pawl sumpai nei nan cazir tha duh lo le tumtahmi nei lo, ramdang thlen hnu lawngih tlawngkai le sumpai hawl tum Jordan tiva kap ihsin Israel fate pawlin Jordan tilian an thlir vekih hngak le thlir kan tamtuk lai! Mi tampi cu zir tam aiin an theihmi malte suah ih lar an tum. Mino tampi cu lar an duhtuknak ah zir tam le teimaknak lamzin in an pial ih an thiamnak le zirnak in a tlin leh si lo tikah lar si lo, thiam si lo dinhmun ah an suak. Teimaknak in zirsuah ih thiamlam aiin mi ih theih dingih Degree lak le lang an duh theu. M.Th., M.A., Ph. D. kan timi pawl khi fimthiamnak a si loih fimthiamnak kan timi cu minung mah rori ih kan zir ih, kan theih ih, kan thiam ih, kan tonteh ngahmi khi a si sawn. Hi pawl hi sumpai malte ih lei theimi an siih, khi a tlunih ta pawl khi paziat khal nei awla na thiam cuang si lo ahcun mifimthiam pa (educated person) tiin zohman in an lo ti dah lo ding. Delhi kan mino pawl 98.9% hrawngin Internet le Computer an tham nan eihhawlnak ih hmangthiam cu 0.001% hman an tling zik lo. Kan mino pawl IT san ah an tlawm ngah riai. Teimak tentote ih an zirbet hrihlai a tul tinak a si. Maw mino, tui can ah ziangvek fimthiamnak na zir ih na nei ih cumi thawn na cawmawk thei ngai maw?
Mino le Pursumleilawnnak: Kan mino tamtak cu fimthiamnak zir theh le nei cingih kan ram suahsan in mi kuthnuai ih hnatuan dingih pumpe aw an tampi. Kan moral le spiritual khal kan thleng a tul nasa. Mairam ih bawi upa dinhmun ih ding thei nan sumpai hi a thupibik ti ruat in mahte mi ih kuthnuai ih ret awtu si hi mahte mi nauta ih ret awtu an si. Mi tlunih ding tum loih mi kuthnuai ih kun ringring tum hi teimaknak le hlawhtlinnak ih ral a si. Mi kuthnuai ih hnatuan loih mahte ei in hawl tum kan mino lakah ziangzat an um? Tunai kum reilote ah Yangon ihsin rualpi za Malaysia ah an feh zik ih nunau nute pakhat cu thla a cam ih Pathian rinsannak thawn miram ah hnatuan loin kan ram ah lamzin ih ka hman dingmi sumlu hmangin ei ka hawl sawn ding a tiih, mobile dawr fate a ong ih, a rei hlanah dawr tumpi ah a suak ih milian ah a cang. Cuvek thotho in Tuluk tlangval pate cu Yangon ah inn tumpi an sakmi ah a hlawhawk ve ih a thinlung sungte’n himi inn hi ni ni khatkhat ah ka ta a si leh ding a tiih, teimak suah in ziangkim ah tan a la ih, cumi innpi cu a mai ta ah a cang ngai taktak. Kan mino pawl hin zirnak lam le pursumleilawnnak lamih teimak le hmailam caan saupi an thlir thiam ahcun tumtahnak sangpi thawn teima zetin hna an tuan dingih, cui teimaknak ih rahsuah cu hlawhtlinnak a si dingih, cui hlawhtlinnak ih parmawi cu nunnak ih umzia sangbik a si.
No comments:
Post a Comment