DBCF Meifar, October, 2013. THLACAMNAK IH THIL TITHEINAK CU ZIANG A SI?

THLACAMNAK IH THIL TITHEINAK CU ZIANG A SI?

Rev. Amos Thang

Thlacamnak ih thil titheinak cu kanmai pumpak ah nung in a cangvai le cangvai lo cu mahten kan thei cio ko ding. Thlacamnak ih thil titheinak cu Bible kan zoh asile Pathian ih thil titheinak a si. Cucu Bible bungcang hmang in kan ruattlang hnik kei uh.

1. Cahnak huham thawn a khatmi Bawipa Pathian in ziangkim a tithei ih; a hrang ahcun zianghman thilharsa a um lo (Luk. 1:37).

2. Cuih Pathain in a hnenih thlacam dingin in sawm. Tahthimnak ah rampi uktu bawi pakhat khat in nan duhmi dil uhla, ka lo pe ding ti hai sehla, a zamrang theibik in kan dil ko ding. Cuvek in ziangkim tithei Pathian in ‘dil uhla, ka lo pe ding’ in ti nan, kan dil lo hi cu; dil uh titupa kan theihfiang lo ruangah a si ding ti’n ka ruat. Pathian hnenih thlacam hi cat loin cam tento ding a si (Luk. 18:1); Lungawi thusimnak thawn (Phi. 4:6); Zumnak thawn (Jam. 1:5); Pathian ih duhnak sungah (Mat. 6:10); Pathian sunlawinak hrangah (Joh. 14:13-4); Pathian hnenah thinlung thiangten, felten thlacamnak in nasatak in thil a tithei (Jam. 5:16).

3. Bawipa Pathian in a fale pawlih thlacamnak a thei. Thlacam dingin amah in in forh ih ka lo sang ding ti’n thu in tiam. Saam cangantu in, “Ka harsat can ah Bawipa ka Pathian ka ko. A biakinn ihsin tahhnawh ih a hmaiih ka fehnak ka auaw cu a hna in a thei,” tiah a ti (Saam 18:6).

4. Bawpa Pathian cun thlacamnak cu a sang hrimhrim ti hi Bible tongkam ah a fiang. “Maw Pathian, thla ka cam tinten i theihsak ringring,” (Saam 17:6). “Miding pawlin Bawipa cu an ko ih an aw a thei. An harsatnak hmuahhmuah sungin a luatter hai” (Saam 34:17). Zumtu zaten zumnak thawn kan thlacamnak cu zianglam a si khalle in sang hrimhrim ti cu theih ding a si. Ringhlel deuh cingih thla kan cammi hman, Bawipa cun a sang a si. Tirhthlah 12 sungah zumtu pawlin Peter thawnginn ihsin a suak theinak dingah thla an cam ih, asinan Peter thawnginn ihsin a luat taktak tikah an zum lohli ngamsal lo.

Thlacam ih thilti theinak cu kan hnenin a luangsuak loih tongka mawi le thiam takih kan cam ruangah tla a si cuang lo. Kan umdan, taksa cangvaihdan le milai hriamhrei tlun khalah a thum aw lo. Kan thlacammi sannak cu Pathian hnen ihsin a rami a thil titheinak cu a si. Amai tikcute ah amai duhzawng in in sang theu a si.

(Recommended Resource: Prayer, The Great Adventure by David Jeremiah.)