DBCF Meifar, October, 2013. Pastor Sermon.

JOSEPH NUN IH  KAN ZIR DINGMI PAWL

(Semtirnak 45:1-24)

Rev. Nehemiah Sui Nei Piang

Mi rinum Joseph ih nun ihsin zir ding tampi kan nei ih, cumi lak ihsin malte kan rak zoh tlang hnik pei. 

A Saduhthah: A sungkhat unau pawl thawn naih aw zetih umtlang a duh (Sem. 45:4-10). “I rak naih uh, keimah thawn kan hlatawktuk lonak dingah,” a ti. A unau sungkhat a ngaina.

A Sawmnak: Thil nan tisual ruangah riahsia in mawhthluk aw lo dingin a sim (Sem. 45:5). “Hi ram ih in zuar ruangah nan riahsia in mawhthluk aw rero hlah uh,” a ti.

A Theihfiangmi: Midang nunnak run dingah Pathian in i hruai a si ti a fiang (Sem. 45:5,7,8). “Mi nunnak run dingih hitawk ram i thlentertu cu Pathian a si. Mi tampi le nanmah tla nunnak dingih thlahmi ka si. Hitawk ram i thlentertu hi nanmah nan si lo, Pathian a si,” ti’n nun hahdam ih nundan thiamtu a si.

Pathian Ih Cawisannak: Faro hrangah pa, Egypt mi pawl hrangah uktu a si (Sem. 45:8,9). “Pathian in Faro hrangah a pa vekah i tuah ih Egypt ram uktu khalah i tuah,” tiah a ti.

Zawnruahnak: A unau pawl rilrawn ding a siang lo (Sem. 45:11). “Ei ding nei loih nan um ding ka duh lo,” ti’n a ti.

Unau Lainatnak: A unau pawl pakhat hnu pakhat a pom ih a tap (Sem. 45:14-15), cule a pom ih a hnam vivo.

Ngaihsakawknak: “Ka pa a damlai maw?” ti’n a ngaihsak.

A Thucah: “Lamzin ah va to aw hlah uh,” ti’n thu a cah (Sem. 45:24).

Tlangkomnak: Zohthim tlak Joseph cu a parih thil thlengmi parah tuardan a thiam ih thil ziangkim a thazawng in lak pomdan a thiam. Mi innsang buainak ding a si ding ruat in a ka a sup ih amah in harsatnak a tuar ngam. Ziangtik lai khalah milai ih hmuhsual hnakin Pathian ih hmuhsual a phang sawn.

Heb 13:7 sungah, “An nun sungih an umdan le an zumnak khal cawng tha uh,” ti’n Joseph le zumnak ih kan pa pawlih nundan kan cawng a tul thu a sim.

Saam 119:9 - “Ziangtin so mino in ziaza thiang a neih thei ding? Pathian thupek thlun lawngin a nei thei.” Kan  nolai cantha hi pangpar parmawi laitak vek a siih, ka parthatlai can hi Pathian hrangah hmang cio uhsi.

Casiartu kan zate Joseph ih nundan ihsin Pathian a tihdan, Pathian lakih a rinumdan, unau sungkua lakih dudawtnak a neizia pawl lak ihsin zirsuaktu kan si cio theinak dingah le Pathian in thlawsuah malza in sawm hram seh. Amen.