LEITLUN IH JESUH A RA SUAHNAK SAN
(Tirhthlah 4:12)
Pastor Rev. Nehemiah Sui Nei Piang
A hmaisabik ah Meifar a siartu zate hnenah Christmas cibai ka lo buk a si. Leitlun ih Jesuh a suahnak san pawl zohtlang uhsi.
1. Pathian ih catuan thil tummi a si. I Cor. 2:7, Eph. 1:4,11, Tim. 1:9, I Pet. 1:20, pawl hi Bible bungcang pawlah Jesuh leitlun ah a suak ih rundamnak in tuahsak ding cu leilung sem hlan ihsin Pathian ih remruatcia, a catuan thiltum a sizia kan hmu thei a si. Sual a um hlanah sual lak ihsin in runsuaktu ding Pathian in a remruatcia zo. Natnak a um hlanah damnak ding sii a umcia zo. Pathian a thatuk. Haleluija, Amen.
2. Pathian in Eden hmuan sungah a simcia ih, a phuancia zomi a si. Gen. 3:15 ih rul a camsiatnak ah Pathian in Jesuh suah ding a thuthup a phuangcia zo. Rul in a ke arti a cuk dingih anih in a lu a rialbek ding thu a simcia. Cross parah kan sualnak setan bumnak ruangih Pathian thinhengnak ihsin kan luatsal theinak dingah Jesuh in kan hrangah setan a neh ding thu a simcia zo.
3. Pathian in a thlam hmang in a langtercia zomi a si. Gen. 3:21 ah Adam le Evi in Pathian thu an ngai loih an tluksiat ni ah an ningzah in an lawngte fangkheh huhmawinak ah theipi hnah an rak tuahmi ngai ngam loin Pathian in savun a hrukter. Savun um ding cun ran thisen luan a tul. Ran thisen le savun cun rei a daih lo ruangah thisen thianghlim kumkhaw daih le savun hnakih mawi sawn zangfahnak puanmawi kan co theinak dingah a taktak ih Jesuh mawinak kan co theinak dingah Jesuh leitlun ah a ra suah taktaknak a si. Thukam Hlun cun a thlam in a sim ih Thukam Thar ahcun kannih in a tak in kan co thei a si.
4. Setan hnatuan siatbal theh dingah Jesuh leitlun ah a ra suahnak a si. I Joh. 3:8 ah minung in kan doneh thei dah lo dingmi kan ralpa setan in dosak dingih a lu rialbek neknek cangvai thei nawn loih tuahtu ah Jesuh a ra suahnak a si. Kannih in nehnak kan co. Rundamnak famkim kan co hnuah thih tihnak le thlaphannak phun zakip in in luatter zo.
Hminsin: (A) Khualbuk kiltu in Jesuh suahnak dingah hmuntha a hawlsak loih a pe fawn lo.
(B) Herod in halhsiknak le duhhamnak thawn a hmuak ih sual maktara a tuah phah.
(C) Joseph in thiltha tuahnak in a hmuak. A nupi hual Mary ih sual langter a duh lo. Mai sualnak phurhpi khat hman thei loin mi sual hawlnak ah kan thin a bang pang maw?
(D) Mary in Pathian thu vekin a lungkim ih, khualbuk an hawl rerolai khalah a pasal hnenah a phunzai lo. ‘Hnipuantha le satha ka co ngah lo’ tivek men ih kan phunzailonak dingah Mary nun hi kan zoh cio pei uh.
(E) Mifim pawlin an fimnak in an hawl ih Herod tei inn sungah buainak a thleng ruangah ziangtheilo naute pawlin thihnak an tuar phah. Cun kan fimnak le thiamnak thawn Jesuh ton kan tum pang ahcun ziangtheilo mi tampi in harnak an rak ton phah theu. Jesuh an hmuh ngah in lamzin dang in a tlung. Jesuh neitu taktak cu thlengawknak nun, danglamnak nun ih feh hi a si ti kan hmu thei.
(F) Tuukhal pawlin Jesuh naute an hmu ih lungawinak hla thawn an tlung (Luk. 2:15-20).
(G) Simeon in Jesuh naute a hmu ngah ih a hna a ngamtuk ih ka thih khal a nuam ding a ti (Luk. 2:22,35).
(H) Anna hi biakinn ih thlacam ringringtu a si. Amah hi a pasal ih thihsanmi a si. Jesuh biakinn ih an ratpilai ah a hmu ih a nun lungawinak in a khat. Biakinn ngainatu le thlacam nun neitu pawlin lungawinak le hnangamnak in an khat theu (Luk. 2:36-38).
December 25 hi Jesuh Suahni kan lawm menmen siloin misual kan hrangih a ra suaktu Jesuh kha kan upatnak le amah kan sunloihnak ah Christmas ni tiin kan hmangkhawm sawn a si. Jesuh suahnak san taktak thei loin kanmai duhnak le nuam ti zawngih can hmanglonak dingah Thlarau Thianghlim ih pekmi fimnak in hi Meifar hmang in lo malsawm cio hram sehlaw. Amen.
No comments:
Post a Comment