Miphun Duhdawtnak

- Rev. Run Cung Mang

 Bible ah “miphun” thawn pehpar aw in tarlangmi tampi pawl lakah ka duhbikmi cu: “Bawipa

kha a Pathian ah a neitu miphun cu mi thluasuak phun an si” timi hi a si (Saam 33:12). Leitlun mipum million 6500 lenglo sungah mah le nunphung – ttong le calai – neimi miphun kan si thei ve hi lungawiza a si. Ahleice in Pathian nung theitu le biatu kan si hi a sunglawituk. Pathian zumhngettu le miphun duhdawttu kan si cio theinak dingah Bible sungih miphun duhdawttu mi nasa pawl ih nunnak zoh in tuni ah “miphun duhdawtnak” thu ruat tlangin thazaang kan la pei.

Nehemiah ih Miphun duhdawtnak (Nehemiah 1:4)
Nehemiah ih nunnak zirzoi tikah miphun duhdawtzetu a si ti kan hmu thei (Neh.1:2-5). Amah hi siangpahrang ih hnattuan dinhmun saangzet ah um theitu a si. Asinan a sinak ah nuamceen ih um mentu a si lo. A miphun a duhdawt, an khua le an ram a ngaina, a miphun a seherh ih an thuhla pawl a hliakhlai, a ngaihven ring- ring. An ram ihsin a ra thlengtu a upa le rualpi pawl hnen ihsin a miphunpi pawl cu harsatnak tampi tuar in hmuhsuam nautatnak an ton thu, Jerusalem khuapi kulhnak le saangka pawl siat thluh ih a um thu a theih tikah a um thei lo, a ninghang, a ttap rori. Ni tampi sung thin nuam loin zianghman ei le in loin rawl a ul ih Pathian hnenah thla a cam. Culawng si loin amah rori khal an khua le an ram ah tlung vurvo ta hratin, Jerusalem khua kulhnak phardawl cu a din saal, kotka pawl a remttha saal ih an thangsiatnak pawl a rehter.

Nehemiah ih miphun duhdawtnak nun hi zohtthim tlak le cawn tlak taktak a si. Tuni kannih teh ziang kan bang? Kan umnak hmun le ram ah, miphun dang lakah kan nuam aw men pang maw? Mi maksak Nehemiah vekin kan miphun a ngaihventu, a harsatnak parah a tuartu, an hrangah thlacamtu le titheitawk neihsiah thawn a riantu si zuam uhsi!

Bible sungih Pathian mihman, mi maksak pawl ih nunnak kan zirzoi tikah miphun duhdawt hi Pathian ih duhmi a sizia fiangzet in kan hmu thei. Moses vekin miphun dang sinak ih ciahneh thei lo, mai’ miphun duhdawt ih miphun hrangah nung ngamtu, Nehemiah vekin miphun ngaihventu si in thlacamnak thawn atak ih pumpek in miphun tungdingtu le rem tthatu? Khrih le miphun hrangah buk awton ih hnatuan thiamtu si dingin zuam cio uhsi!