Editorial
Milai kan nun... (Human Life)
Milai kan nunnak hi ....
* Tuarnak a si.......... tuarsuak thei tum aw.
* Duhdawtnak a si............. langter tum aw.
* Thinhennak a si............ suup-aw tento aw.
* Mumang a si................. harhsuak tum aw.
* Hngiar(challenge) a si.. hmaiton ngam aw.
* Zalennak a si.................... hmangthiam aw.
* Riahsiatnak a si................... hlip kiang aw.
* Lungawinak a si................... karhzaiter aw.
* Natnak a si .................. ruahsannak nei aw.
* Thihnak a si ....................... Nung thlang aw.
Harsatnak ke Beidonnak
Kan ton caan ah
Zumtu pawl in kan theihsuak saal theu dingmi cu...
Kan ton caan ah
Zumtu pawl in kan theihsuak saal theu dingmi cu...
Thuphan Rel hi Sual ah na ngai maw?
Thu pawimawh suh kan ton tikah, tulai zumtu mi piangthar in thuphan rel hi sual ah kan ngai maw? Thu thimnak ah: Mizaan nan inn ah CNA mi pathum an ra ih thate’n rawl na rak pe, an riak bet. Zingpitte’n an tlanhlo saal. An dung thlun in kawl ralkap panga an ra ih na hnenah: Mi zaan ah mikhual na nei a si lo maw tiah an lo ti ding ziang tin na sawn pei?. A si ti’n thudik na sim asile harsatank nasazet na tuar ding…asinan thuphan na rel ih: Cuvek mikhual ka nei lo, na ti asile na luat ding. Ziang tin na rel pei?
Mi thenkhat cun, “Aat man kuan cawk lo, fim man ei cawk lo” an ti. Cutin asile thudik a reltu cu mi aa kan ti thei pei maw...? Mithen in Anania te nupa cun an lo man thuphan an rel ruangah an nupa in an thih phah, thuphan rel cu sual rori tihnungza an ti lala. Mi then in Peter cun a nun-himnakah Ar khuan hlan ah voi thum Jesuh a pheh thu, Jesuh a thawh saal hnu ah Jesuh in Peter hnenah “mi santlai lo pa” ti’n a kawk fawn ual lo an ti lala. Mi hrekkhat in ‘milai hmai ih thuphan rel cu sual a si lo’ an ti lala.
Semtirnak 27:9-10 ah Isaak in a fapa Esau thluasuah pek a tum ruangah a nu Rebecca in a fapa Jacob hrangih can tha a can theinak dingah thuphan a si lo maw Isaak an bum. Sakhi-sa si lo me no-te sa a ei phah, Lai suan ih suanmi cu sisehla cun a haang tal in a theithiam ding na’n Rebecca in a pasal ei duh zawng cu a thei awm si, a kang in a kang kei ih masala tam nawn a rawi ih thil dangdang a telh ding a zum um, curungah a theithiam lo a si ding malsawmnak cu Jacob in a co phah. Nang teh thuphan rel zohzoh hi sual ah na ngai maw? “Mi piangthar pawl cun thudik rori kan rel ding” By: Pu Con Khuai
Mai’ Ir-awm suak thu...
DBCF ka Hmuh Daan...
DBCF hi ka umnak ding tak cu a si. Sungtel pawl hi Kawlram miphun hmuahhmuah kim- nak hmun a si. Mipi cu Pathian lam hruai nak thawngin kan lung a rual ih Pathian a phuan-awknak hmun a si ruangah hnatuantu pawl khal hlawhtlinnak kan hmu ringring a si. DBCF sungtel zate in Pathian Thutak ah nuntak kan zirnak hmun a si ti thei ringring ding a tha... ka lungawi...
Pu Kap Sang
Pathian thulam khalah kan tha tlang, kan hmar ngai cio. Cun fellowship khal kan lung a rual ih Pathian kan thang- nak ah kan phur. DBCF thansonak dingah hmuitin kan nei. Pathian thunun cak lo pawl hrangah hmakhua kan ruat, cawmtu pangpar hmuanzoh enkoltu tha kan si ti’n ka hmu....
By- Mal Sawm Tluang
...Aw si ,,, A hmai sabik kan Pathian a hmin ka thang- that. Delhi ah kawhhran, Fellowship tampi a um ih mah le umnak ciar ah nuam le tha kan ti cio ding ka zum. Kan DBCF ahhin ka lung a awi ememnak san pakhat cu lungrualzet in hna kan tuan tlang... hihi ka thlacam bikmi tla a si. Ahleice in tong phunkim in Pathian kan thangthat ih pakhat le pakhat mah le tong cio in kan biak-awk thei hi sung lawi ka ti zet. Ziangahtile leilung tlun ih Christian unau mi phun hmuahhmuah kan zate'n hmunkhat te ah lungrualzet ih Pathian kan thangthat timi hi Pathian duh zawng tla a siih,lungrualzet in Pathian duhzawng ih hna kan tuantlang thiam asile tu hnakin kan thangso dingih zohthimtlak kan si ding, ti'n ka hmu.....
Salai Lai Sawi Ceu
Pathian thu ah kan phur ih kan nuam tlang, kan thuken khal a tha in a duh-um nasa. Sunday ni khawm caan khalah a nuam in a manhla nasa. Thlacam khal kan phur tlang cio. Lei tisa ih um kan si bangin mai’ duhzawng ih kawhhran hruai-awk pang ding hi fimkhur a tulzet. Kawhhran hi mai’ thu relnak le mai’ thu lawng fehpinak ding hmun a si lo zia kan thei ih tuni tiang kan fehpi daan vekin ralrin kan thiam ahcun tuhnak in kan DBCF a mawi vivo ding... ka lungawi...
Pate .
Tha ka ti ko... Ziangahtile hruai -tu tin, sungtel tin Pathian kan tih-zah ih hleiah Thiltha kan duh cio in ka thei. Kan khawruah daan, kan pom daan tla Pathian sunlawinak ding ahcun kan thleng thei cio ih a lungawi um ka ti. Hmailam ah minung ih tongpa tan si loin Pathian duhzawng sawn ih kekar daan thiam vivo sehla a tha ka ti. Ziangahtile minung in a tha tiih kan ruahmi tla Pathian mit hmuh ah a tha lo thei ti hi kan thei ringring ahcun a tha sinsin ding. Ka lungawi...
Salai J. Ngun Lian Thuan
DBCF ka hmuh daan cu... a tha -zet ka ti. Ziangahtile Delhi ah um Kawlram mi hmuahhmuah lak ih pawlkom pakhat a siih miphun le Kawhhran tivek thleidan-awknak a um lo ih zalentak in Pathian kan thangthat a si. Thlarau lam le tisa lam khalah Pathian thluasuah tampi kan dong a si... ka lungawi.
Puite
DBCF hi Pathian in in umpi ngai ngai a si ka ti ngam. Kan biakkhawm tla a nuam.DBCF kan si vekin kan thin lungput a kau ih mah le tong thiam daan ciar in zalentak in Pathian kan thangthat thei hi a sunglawituk. Kawhhran/fellowhip dang pawl ih soiselnak tete kan tong rero ko nan Khrih ah pumkhat kan sinak hi kanni DBCF cu a takih hmang le tep ngahtu kan siih mi vantha kan si tin ka hmu. Hmailam caan khal ah bulpak in maw a hnam zawngin maw duhsakbik le thleidan bik nei lote’n lungrualzet in feh vivo hram seh law...
Ma Thawng
DBCF hi a hlan ih a rak kaihruai tu pawl in mi nung mithmai men zoh loin Amah Pathian pakhat lawng rinsan in an kaihruai ih tu ih a tuan rerolai pawl khalin an keneh zawh in an thlun vivo thei ruangah Pathian in a thluasuahzet a si...
Zinghnam ruangah
Kawlram, Laitlang ah harsatnak Thleng lala
July thla ihsin Chin Tlang, Falam Peng ihsin Zinghnam pawl an cangvai thok ih, Lumbang ih lo fingthum leng an ei siat thluh zo. July thla lai hrawng ihsin an luar. Mi tih khal an nei lo, lungto ih den khale an ra suak saal thotho, zinghnam danglamzet an si, zinghnam thahnak sii leinak ding rori hman harsat fawn, khatlam ah tilva le nauhak pawl hrang tih a nung fawn. Curuangah tuahcawp meithal pawl hmangin nitin nihlawh pelh in buai rero a si. Thlanglam Chin Tlang khalah zinghnam an hrang saal ciamco ih, mi
tampi cu nuntu khawsak harsat ruangah Mizoram ah an tlan rero. Matupi Peng sungih Khua 17 le Paletwah Peng sungih Khua 8 lengah harsatnak an tong ve. 2008 kum khalah Hakha, Thantlang, Falam,Matupi le Paletwah Peng pawl ah zinghnam ruangah buainak nasazet in a rak thleng dah zo. Hilai ah zinghnam sii an hman sual ruangah nauhak tam nawn tla an rak thih phah. Hiti vekih zinghnam an hraan theunak hi rua an hung par ih an rah caan ah le rawl khawpkham an hmuh thei lo tikah a si. 2006 kum lai ih Mizoram ih rak thlengmi ihsin ra karh vivo a siih. Kan dung June thla cem hrawngah Kawlrawn, Pegu tlangtluan thlanglam ihsin zinghnam pawl cu mawtaw zinpi tan in milai umnak khua le lo ram ah an thawn ciam co hai. Cuvek thotho in Nipidaw lam ihsin zinghnam pawl khal Nipidaw - Yangon zinpi tluan tan in a rual a rual in an vai ciamco ve. Mawtaw pawl tla cu an cawl ngam lo, zinghnam a rualrual in zinpi tluan ah an khat thluh, mawtaw mit-eng le mawtaw feh khal an tih cuang lo, “mawtaw rialngah ih an ai-awn pawl tla cu tih a
nung ngaingai, zinpi cu zinghnam thi in a sen thluh, zinghnam a thi pawl ih sa kha a nung pawl in an ei ciamco bet lai” tiah June 28 zaan ih a hmutu pakhat cun a rel. Kan ram hrangah thlacamnak thawn kan bawm cio pei uh!
Hram: NINU Senhri
English Ka Zir So Daan II
by - Dr. Run Bik
1976 May thla ihsin Mizoram, Ratu khua, High School ih tlawng saya ka rak tuan pek ah Mizo tong ka thiam a tul ti le English thiam sin ka tul zia ka thei. Mizo tong thiam cu a har lona’n English lawngte ca-bu le radio ihsin zir a tul. BBC le VOA in thuthang ka ngai.1976, USA ih President Jimmy Carter a tlin thu le China hotu pa Moa Tse Tung a thih tla radio in ka rak thei. Theih kauhnak hrang radio ka ngai mi in English zirnak hrangah ka thathnem pizet. Ratu ka um lai ah Readers Digest company ih suahmi cabu “How to Increase Your Word Power”, “Family Word Finder” pawl hi Ratu ka suahsan hnu Aizawl ah khal ka zirlai, Word Meaning thar pawl ngan ka zir ciamco. Ratu ih Pu Lal Zela Sailo tei’ inn ah zaantin nazi 10 tlun tiang khawnvar vang in English zir in ca ka zoh ringring. Tong ka zir daan phunkhat leh cu; kha tawk lai Border Road Task Force ih an captain, Pu Dutta thawn English in kan biak aw ringring ih ka thangso nasa.
Ca siar ka thlah lo nasa. Tut phai le Mat phai ih kawpi(cabbage) hmuan ka tuahlai ah Aizawl ih English newspaper ka cah mi zarhthum dan veikhat ka phur theu, cucu ni tampi sung ka siar.Hitivek Ratu le Aizawl ah le tiva pahnih kap ih tikcu awl hmuahhmuah ih English ka rak zir ruangah 1983 ihsin “Zoeng” thuthngca ka tuah ahkhan Mizo cathiam pawl lak khalah nauta tuk loin ka run um theinak khal a si....Ca siartu zate English thiam ding duhsaknak tumpi thawn...
THEIH HARBIK
?. Thil hmuah hmuah lak ah ziang a hlun bik?
Ans: Pathian, ziangah ti le a um ring ring zo ruangah.
?. Ziang a mawi bik?
- Lei le van a mawi bik, Pathian tuah mi a si ruang ah.
?. Ziang a nasa, a ro pi bik?
Van, tlo-lak kaw-hawmpi a kau bik, a tum bik.
?. Thil hmuah hmuah lak ah ziang a hlun bik?
Ans: Pathian, ziangah ti le a um ring ring zo ruangah.
?. Ziang a mawi bik?
- Lei le van a mawi bik, Pathian tuah mi a si ruang ah.
?. Ziang a nasa, a ro pi bik?
Van, tlo-lak kaw-hawmpi a kau bik, a tum bik.
Sersiammi hmuahhmuah a sungih an um theh ruangah.
?. Ziang thu a um ringring bik?
- Ruahsan nak, beisei nak,
?. Ziang thu a um ringring bik?
- Ruahsan nak, beisei nak,
ziang hmuahhmuah hloh theh hnu hman ah
milai thinlung ah a um lai thotho.
?.Ziang a tha bik?
- Thatnak (virtue)a thabik,
?.Ziang a tha bik?
- Thatnak (virtue)a thabik,
thatnak tel loin zianghman a tha lo.
?. Ziang a rang, a feh cak bik
Ruahnak(thought)a cak bik,
?. Ziang a rang, a feh cak bik
Ruahnak(thought)a cak bik,
minute pakhat hlanah Lei le van deng tiang
a thleng man.
?. Ziang tha a cak bik?
Tulnak a cakbik.
?. Ziang tha a cak bik?
Tulnak a cakbik.
Tihnungza hmuahhmuah hman a pahtlang thei.
?. Ziang thu a olbik?
Khawruahnak, thuruahnak a ol bik.
?. Ziang thu a olbik?
Khawruahnak, thuruahnak a ol bik.
* * *
Australia, Victoria State ai-awh in
Jerry San Luai Thang Zahau
Bawhlung a sit ding
Australia, Victoria State ai-awh in kum 12 tang Bawhlung sit (Student Sport) zuam-awknak tel dingah, Bawlung team 90, a sittu (Player)1000 sung ihsin kan Laimi Jerry San Luai Thang Zahau(kum-12) cu an hril fel zo a si. Victoria State, Queensland State, South Australia, Western Australia, Northern Teritory, New South Wales ihsin August 30 ni ah Newcastel (Nelson Bay) ah an lek ding. Jerry hi New Delhi ihsin 2006 Resettlement in Australia, Victoria State, Melborn ah an thleng. Amah hi Bawhlung sit paih le zuamzet mi a siih 2008-09 ahkhan Student Sport, Mooroolbark club ah Bawlung sit thiambik (best player) laksawng vei(2) a ngah zo. Lek paih le zuam lawng si loin Ca zuam le cathiam pakhat a siih tukum an class ih Fisrt test exam ah hmat tambik a ngah. Hitivek kan Laimi sung ihsin nauhak fel kan neih hi cu kan lungawipi zet a si. Thlacamnak in kan bawm cio pei uh. hram:www.maroondahjournal.com
Than Shwe
le tuanpi pawl
le tuanpi pawl
dinhmun ihsin an hnuk-dawk-aw
Kawlram Uktu Than Shwe, Mg Aye, Shwe Man le Rawlbawi 20 lenglo pawl cu an dinhmun ihsin an hnukdawk aw. Hi tiih an hnukdawk awknaksan cu November 7, 2010, Election ni ah Mipi dinhmun in hril-awknak ah an cuh tum ve ruangah a si ding ti’n an zum. General Than Shwe hi kum-78 a kim zo ih midang pawl tla kum 60 tlun lawnglawng an si. August 27... VOA news
MRTV ih Nuncan Mawibik Laksawng Peknak
Kan ram Yangon ih Radio hnatuannak ah Zohthimtlak, nun can ziaza mawi laksawk peknak ah kan Lai caan ih tuantu Mai Tuan Tuah Mawi @ Mawite cu MRTV ih hnatuantu (Officer) hmuahhmuah lakah, Nun can mawi bik laksawng special lawmman cu tukum 2010 MRTV anniversary ni ah an pe. Hitivek kan Laimi dinhmun ih Miphun hnam danghmai ah Zohthimtlak Laksawng kan ngah thei hi a lungawi um tuk ih Pathian ih umpitnak ruangah a si. Radio hnatuannak ih a tuantu hi Kawlram ih miphunkim an si. Tlangpar mi pawl tla an tamzet. Hram: Myanma news
Miss Universe 2010
23 August 2010, Miss Universe pageant hrilawknak ah Guadalajara, Mexico mi, Jimena Navarrete Kum 22 in a ngah. Navarrete hi Mexico ihsin Miss Universe a pahnihnak a si. A zuamtu Leitlun lengdawh mawi zetzet 82 an si. Navarrete hi a ram hrangah tumtahnak nasazet a nei. Hi, zuamawknak ah mipi million 6 in an rak thlir. Asinan kan dung kum tehkhin cun tuikum hi 10% in a thlirtu an nei mal ti a si.
A hmaisabik CCA Nunau President
A vei(13)nak Christian Conference of Asia ih conference cu Kuala Lumpur (Malaysia) ah April 14-21, 2010 ah an tuah. Cuih tum ah tuhlan ih a um dah lomi CCA president ah Indonesia mi nunau Pathian hnatuan Dr. Henriette Tabita Hutabarat cu president ah an hril a si. CCA timi cu Asia ah Khristian pawlkom tumbik pakhat a siih kawhhran 100 le ram 16 ihsin Church Council pawlkom pi a si. Changmai, Thailand ah Centre lakin Asia hran-g ah Pathian hna an tuan rero a si.
WARC Up Date News (June 2010)
Hindu mi uktu in Khrihfa pawl a lawm
India ih Megalaya State uktu bawi, Hindu mi Ranjit S. Mooshahary cu an sawmnak vekin vei(39)nak presbyterian khawmpi (April 22-25, 2010) ah thusimnak a nei. Hitivek ih Hindu mi in Khrihfa khawmpi ih thusim hi a veikhat- nak a si an ti. Mipi 25,000 hmai ahcun Mooshahary in Isaiah 9:6 sirhsan in “Jesuh ih a ratsannak taktak cu Daihnak (peace) hrangah a si” a ti. Cun Khristian Missionary pawl hitin a lawm, “Missionary pawl in khawte berek ih daihnak an co theinak ding ah pum an pe aw a si,”
WARC Update News (June 2010)
Bupi Thuthan
Pastor Rawngbawlnak:
Tu thlasung kan Pastor cu Home Crusade innsang 4 ah a nei thei.Pa Sa Tin Sum (Hastsal), Nu Thawng Kim inn (Sitapuri), Zahau Mawite (Budella), Pu Hram Lian Bik (Hastal) *August 30 zaan in thok ding. Pathian in umpi hram seh.
Combine Meeting:
DBCF a vei(2)nak combine meeting cu August 20, 2010 (Thur) Biakinn pi ah Pathian lam- hruainak thawng in tluangten kan nei thei. Department tinkim Secretary Report tla ca thawn kimcang ten’ ngan in report pek a siih a ropi ngaingai. Meeting kai tu mipum 40 lai kan kim thei. Meeting ah thuhla thatha tampi a suak, Nipi zing khawm ih mipi hmuak, cibai buktu dingah Nubu pawl in tuanvo an la ih August 24, Nipi Zing khawm ihsin kan thok. Khawm theh ih sungtel thar pawl tla Pastor le Deacon upa pawl in cibai buknak tla an nei
July thlasung bupi sunlut:
1/10 (Rs.64,468/-),Mission (Rs.8,900/-), Thawhlawm (Rs.2995/-), IOM Biakinn hman man (Rs.25,000) a siih azate kom (Rs.1,01,383/-) petu zate parah Pathian in thluasuah pe hram seh.
Mission Thu:
Missionary kan thlahmi pawl:..
*Joseph Naik (Orisa)
*Saya Andru Pen Ting (Rakhine)
*Saya Khen Hauh (Matupi)
*Saya Thla Ling (Matupi peng)
Mission hrang kan thutiam mi tampi pe thei dingin sungtel zate parah Pathain in thluasuah pe cio hram seh.
Audit:
DBCF Department zate Paisa Audit nak cu August 9-13, 2010 ah tluangten thehsuak a si. Kan Auditors Upa Run Sum Sin (Hotu), Upa Myint Shwe le Pa Van Ram Eng pawl le department tin ih sumkiltu le Financial Secretary pawl par khal ah kan lungawizet. Pathian in thluasuah pe hngai hram seh.
July thla member thar: Pathian in pekmi sungtel thar mipum 20 an si.
Mino thuthan
DBCFY Aniversary:
DBCF Youth kum 17 kumnak Pathian hnen lungawi thusim -nak cu September 12, 2010 Sunday sunglawizet in hman ding a siih thlacamnak thawn in bawm cio dingah zaangfah kan lo dil.
DBCF Youth Name List:
DBCF Mino hi tuni tiang 200 hnakin tam kan um zo. Mipum felfaizet in kan theih theinak dingah hmin cazin lak kan thok rero a si.
Choir hlabu thar:
Choir hlabu thar kan nei zo ruangah Pathian hnen lungawi thu kan sim ih tawlreltu DBCFY le thehtiang tlawmngainak saktu pawl parah kan lungawizet. Pathian in thluasuah pek hram seh.
Camera thar:
DBCF Meifar le Blogspot hrangah kan tulzetmi Camera (Nikon) thar Rs.11,000/- cu Pathian in in pek zo a si.Kawhhran sung siat ni/that ni ah siseh, zuk a duh pawl hrangah siseh, hman theih ringring a siih copy khat ah Rs.10/-(Youth President le Secretary) hnenah contact a theih
Youth Fellowship:
Pathian umpitnak thawngin a veihnihnak DBCF Youth Fellowship cu August ah tluangten kan hmangsuak thei. Fellowship ruangah Mino pawl Pathian thu ah kan theihnak a kau ih, pakhat le pakhat kan nel-aw, Mino cangvaihnak lamah tla kan tha a tho tlang ih kan lungrual -nak langternak pakhat a si.
BCA Youth Fellowship:
LCC Tin Jubilee:
LCC kum(10) kim Pathian hnen lungawi thusimnak ah Bupi fehtlang in Church Choir in sawm ih kan Pastor le E.C pawl thawn mipum 50 lai kan tel thei. August 14, 2000 ihsin an ding thok. Tulaifang ih an Pastor pawl cu Rev. Johny Tial Awi le a bawmtu Pastor Peng Thawng an si. Sungtel hi tuni tiang 531 an kim. Pathian in thluasuah pe vivo hram seh.
BIBLE Question
Bible General Knowledge
\1 .Thuthlung Hlun ah : Bu (........)?
2. Thuthlung Thar ah : Bu (........)?
3. Azatekom : Bu (........)?
4. Thuthlung Hlun : Bung (........)?
5. Thuthlung Thar : Bung (........)?
6. Azatekom : Bung (........)?
7. Thuthlung Hlun : Cang (........)?
8. Thuthlung Thar : Cang (........)?
9. Azatekom : Cang (........)?
Capoh
.. ( 1/10 ) ..
“Mawite Pa nang teh tutum fangthar 1/10 na pek ve lo ding maw?”
Ai ha...! “Pa Thang, Pa Lian, Pa Siang te pawl in an pek zo pam ih,
a eitu ding le Pa, Fapa le Thlarau Tianghlim pathum lawng an siih...
Thlarau Thianghlim tla cu Leilung ah in umpi dingin kan ko ringring fawn..
a eitu ding ngaingai cu Pa le Fapa lawng an si ding ih inn hnen te ih pekmi kha
an khop kham ko ding ka zum.
curuangah tutum cu ka pe hrih lo mai ke...
* * *
DBCF Meifar
*
Neitu : DBCF (Y)
Editor & Computer
Salai Thian Za Thang
Bawmtu: Salai Ukte
Advisor: Dr. Run Bik,
Steven Ral Kap Tluang
Pehtlaihnak
91-9910293229
E-Mail
dbcfmeifar@gmail.com
Blog (website fate):
dbcfmeifar.blogspot.com
* * *
DBCF Youth E.C Emergency Meeting
DBCF Meifar
*
Neitu : DBCF (Y)
Editor & Computer
Salai Thian Za Thang
Bawmtu: Salai Ukte
Advisor: Dr. Run Bik,
Steven Ral Kap Tluang
Pehtlaihnak
91-9910293229
dbcfmeifar@gmail.com
Blog (website fate):
dbcfmeifar.blogspot.com
No comments:
Post a Comment