Oneness in Christ

Accident ruangih ke pahnih an tansak mi Bible tlawngta fala

Esther Van Nun Cin Thaung (Esther)

 

Suah kum:

January 9 1985 (25 years)

Umnak khua:

Ong-Shit-Pin, Padaung township, Pagu Division

Bible tlawng kainak:

Southeast Asia Bible College, Yangon, Myanmar

Degree ngahmi:

Bachelor of Theology (B.Th)

Tufang siizung umnak:

Yangon General Hospital, Yangon, Myanmar

Fala Esther ih thuantu tawi

Fala Esther hi U Van Thang le Daw Ting Khaw Ning ih fate an neih mi pa nga lak ah a pahnihnak a si. A tlun ah u mipa pakhat, a tang ah nunau pahnih le mipa pakhat a nei. A nau pa hi tu 2010 kum ah Biology distinction thawn phunhra camibuai a ong. A pa hi Laizo (Falam) mi a si ih a nu cu Thahdo Kukki mi asi. A nu hin 2000 kum July 19 ni ah a rak thihsan. A pa hi Pagu Division, Padaung township ih Ong-Shit-Pin khua ih Forestry Department ah acozah hna a ttuan rero lai tu a si ih a rei hlan ah pension a lak thlang ding.

A nu le a pa hin fate an neih hlan ihsin fate kan neih tikle fapa upa bik le fanu upa bik cu Pathian hnattuantu ding ah kan hlan ding tin saduhthahnak le thlacamnak an rak nei cia. An fate lak ih upa bik hi mi pa a si ih phunhra ong man lo in nupi a neih ruangah a nu le a pa ih an saduhthah vek in thil a cang thei lo. Asinan Esther cu an fate nunau lak ah upa bik a si ih phunhra khal ttha ten a on thei ruangah a nu le a pa ih thlacamnak vek in Pathian hna ttuan ding tumtahnak thawn Bible tlawng a rak kai.

Bible tlawng a kai deuh hlan ah Bible training dangdang tla a rak kai dah. A nu ih a thihsan hnu kum 2003 ah Mandalay ah AG church pawl ih tuahmi thlathum Bible course (3-month course) a kai ih a pakhatnak laksawng a rak ngah. 2004 ihsin 2005 sung khal ah Mandalay thotho ah AG church ih tuahmi Bible training hi kumkhat sung a rak kai.

Cuttheh in, a nu le a pa ih Pathian hnen ih thla an rak cammi famkim ternak ding ah kum 2005 June 1 ihsin kum 2008 December 15 tiang kum 4 sung Yangon ih a um mi Southeast Asia Bible College ah felfai zet in tlawng a rak kai. Hi mi tlawng ihsin B.Th degree a ngah ih a final year ih camibuai a tuahnak khal ah an mah class sung ihsin cathiambik, a pakhatnak laksawng (first prize) khal a rak ngah.

Bible tlawng a kai sungah hin Yangon 8th-mile ih a um mi Brethren Church (Nyi-A-Ko-Mia A-Thin-Daw) ah Sunday School zirhnak lam ah hnattuan a rak bawm. B.Th a ttheh hnu ah a pa le a u le nau pawl umnak Ong-Shit-Pin khua ah a va tlung sal. Ong-Shit-Pin ih a um sungah zarh tinte Pyay ah feh in Sunday School hi thla ruk sung a zirh. Sunday School zirh ding in tlawngkai ni nga tin te Pyay ah a feh ih Zarhpi zaanlam ah an khua Ong-Shit-Pin ah a ra tlung kir sal theu.

Esther hi Pathian duhdawt zet tu le Pathian hnattuan ding do hlawp zet tu a si vek in zumlo tu pawl hnen ih thuthangttha sim ding in timtuahnak a nei. Cuticun kum 2009 July 6 ihsin kum 2010 June 25 tiang Irrawaddy Division ih ummi Pya-bon khua ah kumkhat sung full-time mission hna a ttuan. Sunday School zirh in le zumlo tu pawl hnen ah thuthangttha sim in, zumlo tu a si mi Kawl-Karen le Kala pawl lak ah mission hna a ttuan. Pya-bon ih kumkhat sung Pathian hna a ttuannak ah hin zumlo tu upa 13 le nauhak 51 in rundamnak an co ngah.

Accident thu

Bible lam fimthiamnak pehzom ih zir in Pathian hna hi hmual nei sinsin ih ttuan ding tumtahnak a neih ruangah Yangon ih a um mi Faith Baptist Theological Seminary tlawng ah M.Div program kai peh ding in Esther cun thlacamnak le tumtahnak a nei. Ama’i rualpi pawl in tlawng admission hrangah application khal an rak tuahsak. Cuticun, Esther cu Pya-bon ih mission hna kumkhat a ttuan ttheh hnu ah a pa le a u le nau pawl umnak Ong-Shit-Pin ah a va tlung ta. Ong-Shit-Pin ah ni mal lai a caam hnu ah a Bible tlawng admission le tlawngkainak ding thuhla pawl tawl rel ding ah Pyay ah a feh ih Pyay ih sin Yangon ah kum 2010 June 29 ni, zaan nahzi 11:30 pm ah tlangleng thawn a ra.

A tlangleng to mi cu June 30 zinglam 7 am hrawng ah Yangon, Insein ah a thleng. Pyay ih sin Yangon ih feh mi tlangleng pawl hi Insein ah cawl ta lo in, Yangon main station (Bu-da kyi) lawng ah an cawl ttheu. Asinan tlangleng hi Insein a thlen tik ah nuam te deuh in a feh ttheu ih, cuti ih nuam te deuh ih a feh lai ah Insein ih ttum a tum tu passenger pawl hi an ttum ttheu. Esther khal hi Yangon ih a caamnak ding hmun hi Insein a si ruangah cui hmun ih ttum ding in tumtahnak a nei. Cutin, tlangleng nuam teten a feh rero lai ah midang pawl vek in a nih khal tlangleng par ihsin a ttum ve.

A kut pahnih in thil rit zetzet khai phah ih ttum a si ruangah rangzet in a ttum thei lo. Cun, a ttum zawng ah a hni a ven mi kha tlangleng ke nih a awk ngah ruangah a ke pahnih cu a hni thawn tlangleng ke nih a dir ih a rial ngah cih. Tlangleng hi ke tampi nei mi a si vek in Esther ih ke pahnih cu a khuk tang lam ih sin tlangleng ke dangdang pawl nih khal pehzom in an rial ngah vivo ruangah a ngal ruh pahnih cu a parh (a beek) ttheh. A ngal ruh pawl an beek ttheh ih thi tampi a suah ruangah thi pawt mi reh ding in tlangleng ih a rial beek mi a ke pahnih cu Esther cun amah te puansia thawn a tuam. Hi hi Insein tlangleng lam zin par ih thil cang mi a si. A ke vun in a kaih ruangah a ruhpawl cu an parh ttheh nan a ke pahnih cu a tan suak deuh lo.

Cunticun, kiangkap ih um pawl le Insein palik pawl in an ra bawm. Esther hi cathiamzet mi a si vek in accident a ton ve ten a sungkhat pawl le a kawhhran ih saya pawl phone number le address pawl hi by heart in palik pawl hnen ah a sim thei theh. Cutin palik pawl in a sungkhat le mi dangdang pawl kha an contact bet.

Cuticun, Esther cu taxi thawn an tlan pi ih Yangon General Hospital ih Emergency Department ah nahzi 8:30 am hrawngah an thlen pi. June 30 ni thotho, sun nahzi 12 hrawng ah operation room ah an luh pi. A ke pahnih tlangleng ke ih a rial dip ngah mi hi a biasia tuk ruang ah a ke pawl tan lo ah cun ama’i nunnak tianghman cem thei ding din hmun a si ruangah doctor pawl le amah Esther ih sungkhat pawl lungkimnak in a ke pahnih cu a khuk tanglam deuh ihsin an tan sak ta.

Hliamhma dang khal a ngah:

Esther hi a ke pahnih an tan sak hlei ah hliamhma dang dang khal a pu lai. A vorhlam kawng a kiak (operation tuah a ttul lai ding), a vorhlam ngel (wrist) a kiak, a vorhlam kut zaphak sau pi a tlek, a kehlam kutzungpi (thumb) a pem ih a hmai (face), a lu (head) le a kehlam hna (left ear) pawl khal an pem thluh. Sii zung ih zarhkhat a um sungah thisen lang 16 an than zo.

Tu ahcun Yangon General Hospital ih ihkhun par ah a pa le a u le nau pawl nih an tuamhlawm rero. A ke pahnih an tansak cia mi, a kawngkiak mi le hliamhma dang dang a put mi pawl hi peh zom ih operation tuah ding le tuamhlawm vivo ding a si. Rawl ngaingai a ei thei hrih lo hlei ah hma a tuar mi pawl ruangah a thazang khal a mal zet.

Esther ih a hmailam boruak

Siizung ihkhun par ih a ihnak hmun in Esther cun thazang mal zet cing cun ttan a lak ih hitin a sim, “Tlangleng in ka ke pahnih i rial lai fang ah ka thinlung sungah thil pahnih a hung suak: ka thih tiang Pathian hna ka tuan ding tile kei ka ttawnttaih caan ah Bawipa ih huham hi a cak bik timi hi a si.” Esther cun pehzom ih a simbek mi cu, “Tuartheinak thazang ka neih theinak dingah thla in cam sak uh,” ti a si.

Esther ih a ke pahnih an tansaknak a hma pawl, a kawng kiak mi le hma dang dang a put mi pawl an dam theinak ding ah thla ziangzat a rei ding, asilole, kum ziangzat a rei ding ti hi sim theih a si hrih lo. A pa hi acozah hnattuan a si ih a u le nau dang pawl hi hnattuan an neih hrih lo ruangah siizung ih tuamhlawm awknak ding hrangah hin sumpai an hlawhsam zet. Tuni tiang sii le vai hrang ih an hman mi sumpai hi zumtu pawl le rualpi duhdawttu pawl ih an bomnak ihsin a ra mi a si.

Esther ih a hmai lam nunnak hi ziangvek a si ding ti le ziangtluk in taksa, thinlung le thlarau lam ah thazang cahnak a nei sal ding ti hi zumtu pawl le a minungpi pawl in ama’i Esther ih a ttul sammi siangzet ih an bomnak parah tampi a tthum aw a si.

A bawm theitu ding pawl in:

Pastor Thawng Cin

FBCY Yangon

sayapacin@gmail.com

ahhin contact theih a si.